Outubro non podía comezar mellor en Down Ourense! A inicios deste mes, dúas mozas usuarias da entidade incorporáronse a traballar en dúas empresas da cidade.
Por unha banda, Lupe, participante do programa de Emprego con Apoio, deu un paso moi importante na súa traxectoria profesional conseguindo un contrato en Decathlon Ourense. Este logro é froito da ilusión, do compromiso e do esforzo da propia Lupe, así como do acompañamento e a implicación de todo o equipo da tenda, que desde o primeiro momento facilitou a súa incorporación e a acolleu cos brazos abertos.
Desde Down Galicia tamén queremos poñer en valor o convenio de colaboración entre Down España e Decathlon España, unha alianza clave que contribúe a xerar novas oportunidades reais de emprego e a avanzar cara a contornas laborais cada vez máis inclusivas e diversas.
Pola súa banda, Maite conseguiu o seu primeiro contrato de traballo con 24 anos, grazas á oportunidade que lle brinda a Confederación de Empresarios de Ourense (CEO). Así, durante os próximos dous meses, Maite formará parte do seu equipo como auxiliar administrativa, dando así un paso fundamental na súa autonomía e desenvolvemento profesional.
Por que apostar polo emprego en contornas ordinarias?
O acceso ao emprego en contornas laborais ordinarias é un dos piares fundamentais para lograr a verdadeira inclusión das persoas coa síndrome de Down e outras discapacidades intelectuais.
Ademais, historias como as de Lupe e Maite demostran que a inclusión laboral non só beneficia ás persoas traballadoras, que gañan en autonomía, autoestima e realización persoal, senón que tamén transforma positivamente ás empresas. Apostar por un modelo laboral inclusivo enriquece a cultura corporativa, fomenta a empatía e demostra que o talento non ten barreiras.