Santander Asset Management, Banco Santander e a Federación Down Galicia veñen de asinar un convenio de colaboración para o presente curso escolar 2026-2027 achegando 25.000 euros ao proxecto de Down Galicia “Unha escola para tod@s: Apoio á inclusión educativa de alumnado coa síndrome de Down e/ou discapacidade intelectual”. Esta axuda enmárcase na segunda convocatoria de Comprometidos Somos Más, unha iniciativa centrada en cooperar con entidades sen ánimo de lucro.
Grazas a esta colaboración, espérase que durante este curso escolar 132 alumnos e alumnas coa síndrome de Down e outras discapacidades intelectuais de 105 centros educativos de toda Galicia conten cunha serie de apoios encamiñados a acadar o maior grao de desenvolvemento e autonomía posible a través da dinamización de experiencias educativas de calidade na súa escolarización.
O obxectivo principal deste proxecto é promover e facilitar, de forma coordinada cos centros educativos, a inclusión escolar do alumnado con discapacidade intelectual na escola ordinaria, potenciando ao máximo o seu desenvolvemento cognitivo, social e persoal a través de recursos e metodoloxías educativas que optimicen os procesos de aprendizaxe.
As limitacións dunha persoa convértense en discapacidade como consecuencia da súa interacción cun contorno que presenta barreiras e non ofrece apoios para reducir as súas limitacións funcionais. Polo tanto, se unha persoa se desenvolve nunha contorna libre de barreiras e cos apoios que precisa, as súas capacidades desenvolveranse máis e serán cada vez máis operativas.
A inclusión na escola ordinaria é a vía e o medio máis axeitado para acadar o desenvolvemento persoal, formativo, psicolóxico e social das persoas e, máis especialmente, daquelas que teñen algunha discapacidade. Unha educación inclusiva debe garantir a todo o alumnado o acceso a unha cultura ordinaria que lles proporcione unha capacitación e formación básica para a vida. Trátase dunha escola que non establece requisitos de entrada nin mecanismos de selección ou discriminación de ningún tipo, para facer realmente efectivos os dereitos á educación, á igualdade de oportunidades e á participación.
Nesta segunda convocatoria de Comprometidos Somos Más, Santander Asset Management e Banco Santander renovan o seu compromiso coas entidades sen ánimo de lucro que loitan contra a pobreza infantil, fomentan a educación, a igualdade, a saúde e o emprego digno. Os proxectos son propostos desde as distintas territoriais do banco e seleccionados por un comité ético en función do seu impacto e viabilidade.
Comprometidos Somos Más finánciase a través de fondos sustentables e solidarios de Santander Asset Management, que combinan a procura de rendibilidade financeira coa xeración de impacto positivo na sociedade.