O voluntariado e o compromiso co medio ambiente van da man en Down Coruña. A entidade vén de protagonizar dúas estupendas iniciativas que reflicten a importancia de coidar da nosa contorna, apostando tanto pola agricultura urbana como pola conservación dos ríos galegos.
Unha horta no parque de Oza que xa dá os seus froitos
O Concello da Coruña concedeu á entidade Down unha parcela nos seus hortos urbanos do parque de Oza. Nela, os mozos e mozas do programa de Voluntariado Down, xunto con outros membros da entidade, cultivan con dedicación pementos, tomates, leitugas e plantas aromáticas como o ourego ou a albahaca.
O grupo encárgase de todo o ciclo de cultivo: preparar a terra, plantar, regar, coidar cada planta e recoller a colleita. Esta vivencia fomenta a autonomía, o traballo en equipo e o compromiso coa contorna, ofrecendo ademais uns produtos cun sabor inmellorable.
Primeira participación na limpeza simultánea de ríos de ADEGA
Por outra banda, o grupo de Voluntariado Eco de Down Coruña sumouse este ano, por primeira vez, á XIX edición da Limpeza Simultánea de Ríos, organizada por ADEGA e o Proxecto Ríos. Esta iniciativa mobilizou a máis de 900 persoas en toda Galicia co obxectivo de protexer os cursos fluviais e concienciar sobre a correcta xestión de residuos.
A actividade desenvolveuse o pasado 2 de outubro no río Seixedo, en Arteixo, cunha participación moi activa na que tomaron parte cinco persoas usuarias do grupo de Voluntariado Eco, acompañadas por unha proesional da Área de Formación, Emprego e Voluntariado. Durante a xornada, retirada de residuos mediante, o equipo non só contribuíu á limpeza dunha área natural e do seu espazo recreativo, senón que compartiu unha enriquecedora experiencia de voluntariado recollendo abondosas cabichas, botellas e envases de plástico, latas de refrescos, bolsas e outros pequenos desperdicios.
Dende Down Galicia celebramos estas iniciativas que demostran que pequenas accións locais, xa sexa cultivando na cidade ou coidando a contorna dun río, xeran un gran impacto positivo no noso planeta.